【本報訊】屯門裁判官因不滿一名當值律師的表現，當庭拍枱，直斥對方代表干犯非禮的被告解釋「因失戀及工作不如意而犯案」是不合邏輯，質問「有壓力、分手就去摸人個胸？」公開訓斥律師不夠落力，搬字過紙，並教路若要知真相，就要單刀直入問被告：「你點解咁變態？」
記者：陳美莉 羅日昇
事緣33歲報稱結他導師的男被告郭俊業於本月13日早上，在屯門往上水的小巴上乘36歲女事主打盹之際，伸手摸她的胸。他昨在屯門裁判法院承認一項非禮罪，由代表他姓鍾的男當值律師向法庭求情。
當值律師表示，被告因早前與女友分手，加上工作不如意，一時衝動下犯案，而犯案根本屬一反常態，希望予以輕判。
應問被告「你點解咁變態？」
署任主任裁判官李唯治聽罷即無名火起，直指：「你點知佢係一反常態？你今朝先（第一次）見佢！」言畢即連珠炮發指其求情理據「離晒大譜」，「有壓力、分手就去摸人個胸，係咩邏輯？」
律師繼續求情，指被告被捕後已失去工作且會留案底，李官即謂：「預咗啦，做得呢啲嘢，唔係求情理由！」又指當值律師服務由市民公帑支付，律師角色相當重要，「唔係佢講咩你就講多次」，更提醒律師「呢方面要多下功夫」，要求將案押後待律師向被告索取指示。
律師稍後進一步交代被告的犯案原因，指被告因分手及工作壓力而放棄自己，並非因「鹹濕」犯案。惟李官仍不滿意其解釋，拍枱怒言：「你（律師）完全冇留心我之前講嘅嘢！……光天化日下非禮，佢實在離晒大譜，若呢啲係佢求情理由，我一定判監28日！」
李官又教路：「你應該單刀直入同佢講，你點解咁變態？你唔落力問，佢一定會求其答你啦！」最後嘆謂：「你真係要再落多啲功夫！」
李官兩度聽取被告求情後坦言「未諗到點判」，但強調「我唔會因為你（律師）而判重咗」，批准被告保釋，並為其索取社會服務令、感化及心理報告，案件押後10月6日判刑。
案件編號：TMCC 2700/2014