香江有85隻AH股相對應股份，經緯紡織（350）H股比起A股折讓，85隻當中，排第六，已經夠抵搞。又集團手執多家內地券商股，加埋係內地重磅投資企業中融股東，嚟緊日子肥仔水。
經緯深圳上市A股（000666）最新造13.5港元，香港H股新報7.28元，比A股折讓46%，85隻AH股，經緯折讓排第六。又單係計17隻深圳上市、有對應嘅AH股當中，經緯H股折讓，更加排第四。
講AH股折讓，經緯吸引到痹。阿爺搞大龍鳳滬港通，深圳呢邊冇理由孤芳自賞，遲早深港通，經緯已經有粒等綻放嘅好種子。
再睇落去，經緯手頭揸咗十隻內地股票，當中五隻係大件頭券商股，包括中信、光大同東吳等等。喺經緯今年6月底半年結後，內地股市坐火箭，嚟緊日子，兼有滬港通，經緯手執咁多家券商股，只係等身家暴漲。
再講，經緯亦揸咗內地大型投資機構中融國際37.5%。後邊中融嘅資產管理規模，講緊高達6,000億港元，若果呢轉中港真係大牛，經緯肯定超級肥仔。
PB平同業一大截
未計呢啲增值，經緯NAV9.3元，PB得0.78倍。場內近磅例子有昆明機床（300），除本業以外，再搞金融，家陣0.98倍PB。另一隻浙江滬杭甬（576），透過浙商證券搞內地證券金融業務，家陣PB高達1.77倍。經緯PB，比昆機平咗20%，比滬杭甬更加平咗56%。市場家陣似乎仍以紡織股去睇經緯，所以，PB仲係平咗咁大截。
煲經緯，當上番1倍PB，貼近番昆機，輕輕手，現價已講要升近30%。又中港大牛若果重臨，經緯上到挨近滬杭甬PB計數，係講緊要升1.2倍，到近17蚊。
錢雋
細價股專家
本欄逢周二、三、五刊出