邵子風同朱壽仁（朱主席）因為龍小菌慈善騷掀起風波，噚日兩人喺有線錄影節目《今日觀點》正面交鋒，邵子風狂插朱主席睇霸王騷、不請自來、欠薪又欠債、四圍抽水攝位兼博懵等。邵子風當面向朱主席追數，想追番兩張門票476蚊但唔成功，朱主席死撐話係邵子風細佬邀請佢睇騷，同時將欠債欠薪問題推翻，不斷扯開話題，搞到邵子風好憤怒：「未見過呢啲人渣，擘大眼講大話。」邵子風細佬都有在場同朱主席對質力證冇邀請佢睇騷，苦主之一Helen Chan都在場向朱主席追8,500蚊花籃數，連朱主席助手蜥蜴仔都即場追討欠薪7,500蚊，最終朱主席畀咗1,000蚊賠償畀蜥蜴仔，其餘全部冇清算。
Bella：他說很結實
朱主席噚日帶咗位台灣妹林欣旻（Bella）一同到有線，朱主席向Bella聲稱來港有模特兒工作，但酒店都冇幫人租，朱主席竟叫人住喺佢油塘鯉安苑寓所話係辦公室，Bella仲話：「他有摸我屁股，還說很結實。」節目完畢後邵子風車Bella到朱主席寓所執行李，點知朱主席快人一步將行李搬到大廈樓下點算，Bella有感事態嚴重到觀塘警署報案，同警員確定案發現場。邵子風講：「Bella喺朱主席聲稱鯉安苑studio內遭搣屁股兩下。」直至晚上約8點，Bella轉往將軍澳警署落口供。
撰文：馮仁昭