一大班記者噚日喺理大等一個人煲咖啡，由倒肯雅咖啡豆入磨粉機，再將咖啡粉倒入蒸餾器，開爐煲水，一個人做晒，冇耐香濃咖啡氣味散發到空氣中。呢位叫人等待的煲咖啡人，唔係周慧敏，而係有「理大鄭少秋」之稱嘅校長唐偉章。八方讚佢可以改叫「理大陳豪」，點知佢叫八方將創意用喺其他方面更好。
唐校長鍾意飲咖啡，閒時同唐太玩吓煮咖啡。今年6月佢同校內教職員組織一齊到台中參加咖啡之旅，學識蒸餾咖啡，所以噚日趁同傳媒茶敍，講吓第二個合約期內大計之時，首度公開露兩手。八方試飲佢啲作品，唔苦又滑，一啲咖啡粉都冇，真係要歸功於唐校長──嘅2,000幾蚊蒸餾器。