成功呃到你同你入嚟睇，事不宜遲，立即去片！第一，佔中。大家一定會話，唐牛講呢啲，政治好唔正確喎。無錯，我覺得佔中會令到個市跌，但問題不在於佔中本身，而是有心人會特登推冧個市，然後嫁禍佔中人士。試想想，阿爺無厘頭派個張融落嚟反佔中，周街都可以見到反佔中簽名檔攤，證明宣傳機器一開，無恥程度可以無極限，要喺股市興風作浪，㩒個掣就得。
先減倉候低位撈貨
第二，當炒股散水。大折讓H股三寶──浙江世寶（1057）、東北電氣（042）、山東墨龍（568），有兩隻跌破支持位，券商孖寶第一上海（227）、申銀萬國（218）似散水多個似調整，改革概念股中信泰富（267）六連陰，要錢唔要貨，呢一刻我信資金流向。
第三，個個話炒到滬港通。上至專家股評人，下至C9散戶，都話炒埋滬港通先散水，全世界抱住同一個信念，相反理論可信性更高，今鋪隨時係震倉震到滬港通開車先再炒，儲局2012年9月推出QE3，恒指前一個月都插左千幾點，當時講緊係20000點水平，而家係25000點，下跌空間更大。
P.S.幾時開始跌/跌幾多/跌到幾時？我唔知，市況瞬息萬變，有新view會繼續update，亦已身體力行，將倉位減至零孖展水平，希望可以候低位撈貨。雖然曾教授話高沽抵揸成功機會細過一半，但夜晚可以安心瞓覺更緊要。By the way，由於信奉炒股不炒市，跌市都會有強股，所以推介照舊。
唐牛
https://www.facebook.com/tongcow88