「我喺上環一間拉麵店洗碗。由於我每日都有唔同時間嘅補習，所以係返炒散。時薪真係幾唔錯，拍得上同小學生補習。如果日日返八個鐘，人工已經多過普通大學生一兩成，而全職洗碗更加唔止會返八個鐘咁少。究竟洗碗係咪真係咁好？
我洗碗嘅地方就係廚房，好彩有個小風扇對住我都唔會覺得好熱，但着住水鞋企幾個鐘已經覺得有啲攰。冇洗碗碟機冇手套，對手好快就會皺皮。而且間舖無多餘碗筷，洗碗都要同時間競賽。其實論辛苦程度，洗碗係輕鬆過侍應好多，當然洗碗係最卑微嗰個，但起碼無咩機會做錯嘢，唔會成為長工嘅發洩對象。
其實點解我會走去洗碗？我好想知道，係學歷看似越來越唔值錢嘅環境下，究竟低技術甚至無技術職位係咪真係年輕人另一條出路？作為補習老師，經常有成績中下嘅學生問我應唔應該繼續讀書，佢哋都睇到學歷貶值呢個趨勢。另一方面，我有打算投資洗碗工場，今次洗碗經歷可以令我有親身嘅了解。
洗咗兩星期碗，我感受好深，社會價值為唔同職業排咗高低。地位嘅差異同工資未必有實際關係。洗碗雖然卑微，但人工高過不時呼喝我嘅廚師。但無論人工有幾高，我始終係成間舖地位最低嗰個。為咗人工高去打一份被睇唔起嘅工，最難過一定係自己嗰關，連自己都會睇唔起自己。我當係學嘢咁去做，調節心態當然唔難。
除咗被人睇唔起，洗碗仲係一份幾自閉嘅工作。洗碗洗得快無人會讚你，但洗得慢就一定有人鬧你。如果你做保險sell客落力啲就多啲佣金，但洗碗洗得快啲其實都係咩都無。」
各位對這位洗碗大學生，有何評價？請踴躍發表意見交流！
張慧敏
http://www.facebook.com/HKcareerdoctor