貪靚唔係女人嘅專利，近年唔少美容品牌都向男士招手，就連女性內衣品牌都加入戰團。安莉芳（1388）由舊年開始進軍男裝內衣市場，推出IVU品牌，產品包括內褲、內衣、睡衣、泳衣等，仲要走高檔路線，普通內褲要賣300至600元人仔不等，而呢個男裝內衣褲系列嘅產品，最貴嘅去到800元人仔都有！
行政總裁鄭碧浩話，初期推咗一款叫做「隨意裁」嘅秋冬男裝內衣，反應都好好，因為呢款內衣用咗好特別嘅物料製造，任你隨意剪件衫都唔會披口，例如將長袖剪成短袖，幾短完全由客人話事，唔鍾意圓領嘅話，又可以剪做V領，總之任人發揮，真係夠晒獨特。不過，呢款內衣目前只喺內地有售。
雖然產品說明話有保暖功能，但呢個價錢絕對可以買到件保暖大褸喇，而且內衣都係着喺入面，任你剪到幾咁「後現代主義」，都冇乜人見到，除非閣下唔怕凍，淨係着底衫出街啦。