造價升到715億嘅高鐵有排未有得搭，但八方發現港鐵原來已經靜悄悄為高鐵設計咗4款標誌，仲喺知識產權署申請緊註冊商標。
4個標誌都係得字，最簡單一款寫住「HIGH-SPEED跨境高鐵」，隔籬加個港鐵標誌；另外三款就分別寫住「CHS跨境高鐵」、「mstar HIGH-SPEED跨境高鐵」同「mflash HIGH-SPEED跨境高鐵」。八方問過港鐵3個簡稱代表啲乜，但港鐵就保持神秘，又唔肯講用咗幾多錢設計，淨係話4個標誌係港鐵內部負責嘅初步設計方案，申請喺6月提交，而家仲未獲批。其實啲鐵路迷喺7月已經發現呢幾個新標誌，仲喺論壇估幾個簡稱代表乜。較多意見認為「CHS」係「Cross-border High Speed」；至於mstar同mflash，有人就估分別代表頭等同普通車廂，邊個啱就要等港鐵開估先知喇。