迪馬利亞一到，曼聯冇晒R？英國傳媒話，好多魔迷爭住印「天使」件新波衫，搞到球衣專門店入面嘅R印字冇晒，同J字一齊缺貨。我求大俠就認為，R字缺貨應該唔太關迪馬利亞事，原因應該喺安達靴里拉身上，因為佢個名足足有4個R！
迪馬利亞周一晏晝由西班牙出發，搭私人飛機抵達曼徹斯特，晚上同曼聯領隊雲高爾見面，周二朝早先進行體測。英國媒體指，迪馬利亞嘅轉會費係5,970萬鎊（約7.7億港元），佢會同曼聯簽約5年，周薪有20萬鎊。不過，喺「天使」落實加盟前幾日，已經有消息指佢會着7號球衣，所以有啲球迷急急腳去印字，搞到曼聯喺英國嘅球衣專門店周一貼出告示，話R同J呢兩個字母俾人印晒，暫時缺貨。
靴里拉、盧祖合組「6R」
其實曼聯唔夠R字用都可以理解，球隊入面最賣得波衫嘅兩大球星朗尼同尹佩斯，咁啱兩位個名都有R。唔單止咁，曼聯今夏簽咗嗰3位新兵，其中安達靴里拉同馬高斯盧祖個名入面都勁多R，靴里拉仲要屈機到有4個R咁多，而盧祖都有兩個R，再加埋卡域克同湯卡華利等，難怪啲R唔夠印。睇嚟專門店方面都收唔到內部消息，估唔到曼聯一次過簽咁多個名有R嘅人返嚟。至於J字冇貨，我求大俠就覺得同贊奴沙有關，一來贊奴沙個名有兩個J（Januzaj），二來佢換咗冧巴，應該好多人想印佢件新11號。
簽維達爾「風繼續吹」
連埋迪馬利亞條數，曼聯今夏已經用咗過億鎊增兵，但似乎仲未夠喉，英國《獨立報》披露，曼聯會再出價3,400萬鎊求購祖雲達斯中場維達爾；英國《每日快報》就話，曼聯會考慮將查維亞靴南迪斯加入交易，希望說服祖記放人。
識睇，一定係睇足英台【英波Live】：
http://soccer.appledaily.com
http://bit.ly/engballlive