「總之冇一千呎單位，我就一！定！唔！嫁！」呢個唔係電影橋段，同阿旋拍拖五年，對於呢個女朋友，我俾99分，細心、體貼，入得廠房，出得廳堂。我呢個文員仔，唔係咩新鮮蘿蔔皮，有個咁好嘅女朋友，唔娶佢對唔住自己。結婚呢個問題唔係冇傾過，問題係佢堅持要結就要一個1000呎單位，真係玩我咩。屋企環境唔好，又要養家，畢業幾年，人工追到通脹我已經偷笑，喺阿旋催促下，係儲到少少錢，得35萬，但做得啲咩。
「你即係玩我啫，報紙話就算入到屯門，300萬樓都幾乎冇，你仲要1000呎！不如用200萬嵐山劏房單位，200萬上到車，袋住先啦！」
「邊有人咁Sell嘢架？你如果真心覺得嵐山好，應該同我講，『200萬上到車，唔上就笨啦』。你用得『袋住先』呢個字眼，即係你都覺得呢個方案係唔好啦。總之冇1000呎冇得傾。」我認，我喺阿旋面前，絕對係一個唔長進嘅小男人，如果佢發脾氣，就算心裡面充滿怒火都好，都會好似煤氣爐熄掣的一瞬間，FOP一聲消失。
正當我以為我注定成為高登另一個案例，做一條因為買唔到樓而娶唔到老婆嘅可憐蟲而感到絕望時，一個包裹嘅出現，令我一生人嘅命運改變。
「李生，麻煩收件。」郵差送來一個盒，拆開後，入面有個大約兩吋高嘅沙漏，金色通花，懶係傳統英國皇室feel咁。盒入面仲有張好舊嘅卡仔，字有啲濛，但總算睇到。
「時光機用法：你有三次來回過去與現在的機會
默唸日子，將我逆時針反轉，回到過去
輕拍中間，重回今天」
我唔知係咪有人玩我，但當港鐵（066）越加價越故障；交稅起高鐵，越起越Delay；成日話樓市就跌就跌，但越講越破頂；又話2017有普選，點知都係搵笨。世界都玩得我透了，反正都係，唔差在做多一次傻仔，再講，又唔會好似強迫金會蝕水嘅。OK，三次機會呀嘛，反正就試吓回到過去，我為咗阿旋，我要拎住呢35萬返2003年！
＊＊＊
我按指示默念一次日子，「2003年8月1日」然後將沙漏反轉，耳邊隨即傳來幾陣風聲。家中一切似乎冇變，唔服輸的我即時開電視，新聞講緊嘅係50萬人71遊行。果然WORK！內心複雜嘅心情我唔想多講，亦相信冇人想睇，而我當時唯一想做嘅，就係填補人生中其中一大遺憾：買淘大花園！
行出街，後沙士嘅香港，雖然負能量仍然高，但街上冇自由行，少了一陣銅臭味，感覺良好。去到九龍灣，我好快搵到個代理，「先生，依家淘大冇得做按揭，你照買？」二話不說，「唔使睇樓，即買！」
連代理都話我好博好夠膽，「10年後，你會因為你今日冇入市而後悔。」呢句話聽落夠霸氣，只有未來人先有資格講，我鍾意。如是者，於03年我做咗淘大業主。完成交易後，我好順利返去今日，查番文件，間屋仲係我個名，依家層樓市價約400萬。
「阿旋，其實我本身都有間400呎樓，不如袋住先。」我唔想咁快用晒神奇沙漏俾我嘅Quota，以備不時之需，「唔得，真係要1000呎先夠住。」旋，我尊重你的堅持，不過你真係一個港女。
「升十倍、廿倍都唔關我事啦，賣咗層樓，賺咗錢都買唔番另一層，鬼咩！」有淘大業主兼住戶咁同我講過，不過我唔同，我賺完後仲可以回到過去，用賤價買番層樓。所以我即時再Check下2003年400萬買到咩！結果發現，原來今日一層淘大，喺03年就買到層1000呎擎天半島！但今日一個擎天單位，叫價要2500萬！
有升冇跌嘅香港樓，根本唔係俾普通人買；但我唔係普通人，而係時光旅人，「這些機會終於是我的。」如是者，我又再出多次古惑，做多次時光旅客，返去03年買咗層擎天半島，再返來今日嘅時侯，我已經係一個擁有市值2500萬，千呎單位嘅業主。如果冇時光機，我諗我連層淘大樓都買唔到。我想搵阿旋，想喺間千呎大單位向佢求婚，佢應該冇再拒絕我嘅理由。
「阿旋，你喺邊？」電話傳來嘅係啜泣聲，唔係阿旋，係佢媽媽，「佢岩岩…撞車去咗啦。」
＊＊＊
過去呢幾個月，香港依舊嘈炒，樓價照破頂，我層擎天仍然喺度。香港冇咗亞視，應該只係冇咗一個墊底嘅電視台；但我冇咗阿旋，就好似亞視冇咗王征、盛品儒咁，冇咗靈魂。呢一日，我上阿旋屋企執遺物，我發現一封信：
「Robert，你發現呢封信時，我應該已經唔喺度。」好多時韓劇入面，過咗身嘅人寫遺書，一定用呢句做開場白，估唔到咁老土嘅事，會發生喺我身上。
「你最近收到個時光機，功能其實除咗可以回到過去外，仲可以去未來，只不過我冇俾full version嘅說明書你。早於你收到個時光機好耐好耐前，我已用盡三次Quota，用咗第一次後，我就知我今年會意外死，但無論我用盡咩方法，都改變唔到生死嘅命運。
我知道你一直覺得我好港女，逼你儲錢，仲話冇1000呎唔嫁。香港樓市癲㗎，我咁樣都係想你盡快儲到個錢，我就可以俾呢個秘密武器俾你，等你快啲喺美國加息前，擁有第一個單位後，再細屋換大屋，你同你屋企人可以過得舒服啲。至於我點解會得到個時光機，你唔好去搵答案了。」
阿旋所做嘅一切，原來都係為我好。離開時，我坐港鐵走，見到有隻狗仔喺路軌行，港鐵職員冇抱返佢上嚟，之後隻狗唔知去咗邊，而列車則如常開出。我唔知隻狗會唔會出事，但如果當時港鐵職員有出手抱起佢，我肯定佢唔會因為俾車撞而死。
唔理，我要試吓救阿旋。我望住阿旋留低嘅說明書下半部，「默唸日子，將我順時針反轉動，抵達未來。」
by千頌C@堆填區
http://fb.com/winbigwok