狼英上場後，左王邵善波接管中央政策組，佢嘅權力大增、員工亦財源滾滾。八方有證據㗎！中策組近日第N次招聘研究主任同高級研究主任呢兩個職位，相比起狼英剛上場時，呢兩個職位起薪點增加一成半，頂薪點增加逾兩成，大幅拋離其他公務員，連香港公安都被比下去。
學歷由博士降呢到學士
兩年前，中策組嘅研究主任起薪點2.7萬，家下應徵呢個職位，月薪增至3.1萬，頂薪點就由3.1萬飆升到近4萬；高級研究主任原本起薪4.1萬，𠵱家起薪升到4.7萬，頂薪就由5.2萬升至6.3萬，多咗超過一皮嘢。兩年前後，呢兩個職位入職雖然有啲相似，但當年應徵高級研究主任要博士畢業，家下學士已OK。
公務員就冇左王嘅𡃁咁好運，起薪、頂薪點兩年來都係加咗唔夠4%。例如政府兩年前請助理文書主任，起薪點11,520蚊，兩年後都係加咗唔夠500蚊。被指淪為狼英鷹犬嘅警員都一樣慘，初入職嘅「散仔」兩年前月薪18,810蚊，但連番打擊示威遊行有功後，家陣警員嘅起薪點都係多700蚊，兩皮都唔夠！