唔少上市公司有私家大廚，「梁粉」陳啟宗旗下恒隆地產（101）就有一位做咗21年嘅大廚盧偉權。佢原本喺鳳城工作，後來走去幫陳啟宗打工，每當公司高層搞飯局或者陳啟宗請客食飯，就要佢出馬。盧師傅多數做廣東菜，聞說最拿手同埋最經常煮嘅，係蝦多士、大良炒鮮奶同埋炸子雞，照咁樣推斷，呢三道菜應該都係陳啟宗嘅至愛。
臨近中秋，盧師傅前日就第一次教恒隆一班義工同事做月餅，其中一名「學生」就係今年4月由港鐵（066）過檔，現時係恒隆審計總監嘅曾殿科，曾殿科之前喺港鐵係負責管數。佢最初仲以為搓麵糰易如反掌，搓落先知唔係咁易。佢哋製作咗過百個月餅，將於本月底去一間老人中心送畀一班長者。