雖然貴為內地龍頭地產商，但萬科企業（2202）主席王石不嬲都好有憂患意識，成日話個市有泡。前日佢話擔心下一個倒閉嘅係萬科，噚日又繼續「恐嚇」，話內地房地產嘅黃金時代玩完。
王石話，中國房地產行業嘅黃金時代已結束，白銀時代嚟到。所謂黃金時代，就係耷低個頭就有金執，白銀時代就係要花啲心思去搵先有。佢話消費者對產品同埋服務要求更高，開發商唔係低頭遍地黃金。照佢咁講，咁即係執得辛苦啲啫！
佢話最近房地產形勢有微妙變化，但佢依然保持謹慎樂觀。萬科已經係內地一哥，如果連王石都覺得個市好難玩，咁仲有邊個撐得住？
王石一向都擔心個市有泡沫，前日佢先話萬科轉型唔明朗，擔心下一個倒閉嘅係萬科。