曾是連續十三屆香港冠軍騎師的韋達，上季首次斷纜，被宿敵潘頓打破其壟斷局面，失去冠軍寶座。剛從意大利渡假回港的韋達說：「暑假我的體重沒有太大變化，未來會慢慢增加操馬數量。在香港做騎師，競爭向來激烈，每年我都會接受不同的挑戰，我會盡全力，希望可以爭取更多頭馬，以及揚威香港及海外的大賽。」
的而且確韋達雖然休息個多月，暑期沒有披甲出賽，但身形依然保持甚fit，一點也不肥，其他騎師真係唔恨得咁多！呢一日(25日)韋達復課首匹操嘅係102 分一班馬「隨心隨意」，喺大圈跳三段，晨操專家積奇話此駒的走勢只是平常。其後韋達試「自成一格」、「夢仙」、「兵威振」、「豈等閒」，全朝一共操五駒，最矚目當然係「兵威振」，暫時唔算好弗，但姿態輕鬆，走過有大將之風。呢匹短途怪獸連同來港前五戰全勝，每次例贏一身位以上，韋達復課首天即霸住操，可見對佢高度重視，而隻馬今季首個目標，就係10月1日1000米三級賽國慶盃。