睇菲律賓拳王帕奎奧（Manny）比賽，貴過睇世盃決賽？真係冇花假，上月巴西世盃一張決賽門票盛惠7,700港紙，但11月23號喺澳門金光綜藝館舉行嘅「金光決戰2」，想睇帕奎奧對美國「碩士靚仔拳王」阿爾吉里（Chris）嘅WBO次中量級冠軍戰，最貴要畀成24,080港紙，認真誇張！
下戰書要K.O.碩士拳王
Manny去年11月首次到金光綜藝館打咗場翻身戰，當時最高票價已經要近萬蚊，但全場14,000個座位依然爆滿，連「萬人迷」碧咸、名媛Paris Hilton同韓星G-Dragon都嚟捧場。
今次票價夠膽三級跳，35歲嘅Manny當然係票房保證啦，正爭取職業生涯第57勝嘅佢，噚日同對手Chris一齊去到澳門做宣傳；雖然俾對手高一個頭嘅身材兼靚仔外表比下去，Chris仲特登扮矮遷就Manny影相，但見慣大場面嘅帕奎奧冇hard feeling之餘，反而好氣定神閒咁話：「我知Chris身材比我高、動作比我快，但我有信心，更希望今場喺澳門能夠K.O.對手；我好耐冇K.O.人啦，相信大家都好想睇到。」（對上一次T.K.O.喺2009年）
11月大戰未開打，Manny同Chris先嚟一次牙骹戰。後者上星期喺美國長島家鄉以冰桶挑戰挑Manny機，點知Manny冇回應，到噚日記者會被問到呢個問題，Manny就話：「我梗係會接受冰桶挑戰啦。我計劃咗喺今次世界巡迴宣傳後、大概下月初就會做，籌款嘅事我覺得好有意義。」Manny噚晚已經跟大隊飛到上海，出席今日嘅記者會，之後仲會去三藩市、拉斯維加斯同洛杉磯繼續做宣傳。
順帶一提，「金光決戰2」同場仲有中國鄒市明嘅世界拳王資格賽，同埋香港「神奇小子」曹星如嘅比賽㗎。除咗兩皮幾嘅最貴門票外，最平880蚊就有得入場，門票周五開始有得賣。
識睇，一定係睇足英台【英波Live】：
http://soccer.appledaily.com
http://bit.ly/engballlive