如果一間startup有齊科網、80/90及獲巨額注資三個元素，大家一定畀like不留手。噚日有單新聞，話有個後生仔叫鍾培生，打機打出盤生意來，成立香港電子競技公司，專門搞電子競技比賽。報道仲話今年3月獲本地投資者注資約6,240萬元，好似好叻咁。鍾培生其實係富三代，佢爺爺係工廈大王怡華集團華廈置業（278）的創辦人鍾江海，家族於2006年曾發生爭產風波。唔係話富三代就唔可以有作為，但消息指，今次出手注資嘅其實就係自己屋企。過去科網公司獲第三方注資，反映有人睇好公司；而今次注資，根本唔應該吹捧做「盤生意好勁」、「老闆好叻仔」，最多都係話間公司後台勁囉。
上周五中國最大伺服器供應商浪潮集團，即浪潮國際（596）母公司宣佈與IBM合作。內銀一直依賴IBM技術，之前內地政府開始研究呢個情況會否危害國家安全，當時IBM最大對手浪潮已企圖搶走IBM客戶。而家雙方合作，更加鞏固浪潮地位，旗下專營軟件嘅浪潮國際會受惠。中國政府近期積極去IOE（IOE是指IBM、ORACLE、EMC簡稱），早前阿里巴巴旗下阿里雲計算與浪潮達成戰略合作，發展雲計算平台，目前針對雲計算的十三五規劃已經啟動。集團已發盈警，指半年會蝕錢，相信負面消息已反映，公司前景會好轉。留意股價破唔破到1.9元阻力，見有勢可跟進。
Fifi
http://www.facebook.com/lovefrystock
本欄逢周二、四刊出