只係出過4首歌嘅MK-POP FAITH，噚日喺尖沙嘴科學館演講廳舉行「FAITH飯聚玩唱會」，門票一律80蚊港幣，個騷雖然今個月初截止賣票，但噚日臨開騷重有票賣。
入座率達9成
馮仁昭噚日入場睇佢哋搞乜東東，現場近300個座位有9成入座率，大部份都係10幾歲嘅妹妹仔，佢哋見到FAITH好興奮，又尖叫又握手又拉住合照，唔講仲以為係邊個天王開騷㖭。雖然話飯聚，但成個騷冇嘢食提供，2個鐘頭裏面有歌有跳舞有玩遊戲贏服裝現金券，又有龍小菌做嘉賓唱歌，經理人又上埋台合唱，仲有一位社福界代表胡淑星上台講年輕人夢想，成個雜錦騷咁，80蚊2個鐘都好抵睇。
先後換咗4套衫嘅FAITH唱咗《Stop Peeping》、《MAMA Easy》、《Soul 4 U（因你Soul了）》同《I fall in love》僅有嗰4首歌，跟住再唱謝霆鋒、陳奕迅、周杰倫同蘇永康等前後8首歌，佢哋唱功一般，舞步唔係太齊又不時甩嘴走音，粉絲一樣睇得好開心。成員Sky、HiuYong及Wave接受訪問，佢哋話：「好開心有今次聚會，嚟緊9月都有歌迷聚會。」Sky就話就嚟中四開學，所以未來活動會少啲參與。
撰文：馮仁昭