上周我話過買大陸4G買摩比（947），你一定要睇番我上周篇文。之後摩比出中期業績兼做發報會，營業額升一倍，盈利升近五倍，相比海天（8227）因只係識做2G、3G天線業績PK。中移買4G設備幫襯華為同中興通訊（763），中興就幫襯摩比（華為天線等係自家制）。成立時，摩比成村人同中興千絲萬縷。
我問本地電訊商，佢哋都有測試過摩比天線同機站，完全達標外，仲要平好多。所以睇業績，外國特別係印度4G都開始買摩比啲嘢，到印度要上4G，都會用摩比。摩比都覺得中國嘅亞洲區（即包今年嘅中移），2015年4G基本投資多2014年一倍，係有根據。
中興華為鬥到七彩
中移2G發射站有90萬個，3G就少過50萬個，喺今年尾4G達50萬個。根據摩比內部預測，中移未來三年每年要再起30萬個，即120萬個。當我問香港啲電訊行尊時，佢話根據物理120萬個係極度保守。即係來年摩比嘅定單，會比今年上半年增長速度仲要快同多。
你可能會話政策成日變，係咪真係會投資咁多？中移2G同3G都係中央話點佢就做，摩比管理層喺發報會當日，忍唔住講咗兩次，面帶嗰種父母見逆子回頭嘅喜悅話：「今次係內地電訊業第一次唔係國家要基本投資，而係企業自發咁要。」即係消費者要求work嘅無線寬頻，而家有，就解釋中移點解唔使補貼，兼自發要求做基本投資，因2G客隔代上4G。鬼佬同港燦，一路都話大陸人唔用3G係因文化、大陸人窮等，所以啲股價完全冇反映成個勢！
最後，中興同華為一定將會鬥到七彩，特別喺外國，華為自家製定中興搵供應商合作會贏未知。不過如果全自家製有優勢的話，你估幾百億元市值嘅中興，對住15億元嘅摩比會點？收購？唔好話我今日冇盡責咁出盡力叫你買，12個月摩比目標價最少3元。
孫柏文
獨立股評人
http://facebook.com/shuen
本欄逢周二刊出