國泰航空（293）前年底開始推出「fanfares」，每逢星期二晨早8點畀大家上網以優惠價買經濟位機票，聽聞就曾經試過搞到網絡大塞車，冧晒機。國泰今日晨早8點又有fanfares，仲要係100大元買2,014張商務或特選經濟客位，飛倫敦、馬爾代夫、大阪等11個航點，每人每次限買兩套機票，幾乎可以肯定國泰個網站實會塞到爆。
國泰方面都知道今次活動夠晒吸引，公關大員回應話，吸取之前活動嘅經驗，公司已經採取措施應付fanfares網站激增嘅流量，佢哋已經提升系統，希望確保網站能夠處理今次優惠引起嘅高流量，現時人人都有手提電腦、平板電腦，聞說好多人為咗入到國泰嘅網站，都會一齊開幾部電腦，務求有一部撞到入去咁話。