香港唔少大孖沙，雖然年紀唔輕，但係仍然有心有力，其中一位肯定係嘉華國際（173）與銀河娛樂（027）兩間上市公司嘅主席呂志和。呂志和噚日心情唔錯，打咗條搶眼嘅桃紅色領帶，出席嘉華中期業績會。佢可能擔心耳仔唔太靈光，一開始就搵人幫忙，戴上無線咪同無線耳筒，全程專心聽實公司財務總裁許亮華講解業績。
去到答問環節，呂志和位千金呂慧瑜坐喺爸爸側邊，負責抄低所有提問，再慢慢向呂志和解釋，然後就差唔多全部問題都由呂志和解答。其中，講到嘉華上海靜安區有個豪宅新盤，呂志和非常歡喜，指宋美齡、宋慶齡都曾經喺附近住過，歷史悠久，佢仲同記者開玩笑咁講，話「自己都想返去踎吓」。耳仔唔靈都冇影響佢嘅幽默感！