都話商場上冇永遠嘅敵人，記得舊年阿里巴巴創辦人馬雲高調講過，網購同電商引發嘅市場力量可以將商用物業價格下跌，此話一出，多位內房阿頭即時反駁，其中一位係萬科執行副總裁張紀文，直指馬雲乜都夠膽講。
之但係，唔夠一年，兩間公司噚日宣佈有個嶄新合作，用戶喺淘寶淘咗幾多錢，可以直接用嚟扣減買萬科樓盤嘅樓價。
根據淘寶房產網資料，淘寶網嘅用戶全年淘咗幾多錢，就可以喺萬科位於全國12個城市中嘅23個樓盤直接扣減樓價，上限可扣200萬人仔。
呢個計劃最多可以幫買家慳10%，即係你買個2,000萬人仔嘅單位，先可以用盡200萬人仔呢個上限。聽聞唔夠半日，已有140幾名網民享受到100萬人仔優惠喎。
成件事聽落好似好吸引，但其實即使你淘夠數，會唔會因為你有呢個優惠走去買樓呢？
如果真係想買樓嘅話，你又會唔會因為呢個優惠走去淘幾十萬唔等使嘅貨呢？難道走去預先淘定一屋家具？