8月尾馬匹操練當然要逐步加緊啦，本周二(26日)沙田馬場將舉行本季首次泥地試閘模擬比賽，共24駒報名分四組出試。練馬師告東尼日前接受訪問時透露，會派遣多駒試閘，結果所言非虛，廐內八駒報名，分佈於四組試閘名單中，配搭方面用上全華班，徒弟蔡明紹和吳嘉晉固然有份參與，最特別是楊明綸、呂卓賢及梁家俊均獲座騎供應。而全日最高分試閘馬，係苗禮德馬房在港未上陣的4歲澳洲自購馬「和順超影」，此駒曾在去年10月12日澳洲1600米一級賽考菲爾德堅尼跑第二，只輸半身位，亦曾喺一場1600米二級賽，轉彎兜大圈情況下都贏，中距離實力不用懷疑，評94分係上季至今插班評分最高自購馬，身價相信一定好貴。
其實「和順超影」上季在港已經試過閘，今年6月底由雷神出試，灰馬仔有前有後，直路冇乜點騎亦得第三，拍住一匹勁到黐肺嘅上季四捷神馬「戰利品」過終點，練馬師苗禮德特登唔急進，留力等今季先進軍一系列四歲馬大賽。至於「戰利品」，咁啱都係四歲，所以佢哋除咗試閘交過手之外，未來喺經典一哩賽亦可能碰頭，大家記住留意佢哋嘅動向呀！