之前有山寨版「四大天王」，喺內地打正旗號扮張學友、黎明、劉德華同郭富城搵銀，前日就有個山寨古巨基喺內地一間酒吧搞歌迷見面會，仲話會用古巨基嘅名義捐款去災區，有網民將幾張山寨基仔演出嘅相放咗上微博，仲tag埋基仔問海報入面個人係咪佢㖭！
「仲用我名義做善事」
噚日基仔同連詩雅、方皓玫等人喺土瓜灣綵排《拉闊音樂會》，基仔話前晚都喺微博睇到啲相，已經即刻send咗畀經理人Mani處理。基仔話：「完全冇提過係模仿我，仲用我個名義話去做善事，我覺得唔係咁好囉！」會唔會採取法律行動？基仔話全部交畀公司去搞，基仔又話：「有朋友睇到都打電話問係咪我，我自己梗係一睇就知唔係自己啦！」
另外，基仔自爆會喺《拉闊音樂會》唱歌送畀老婆Lorraine聽，至於Lorraine究竟係咪有「喜」？基仔聽到即吓一聲，笑住話：「未啩！隨緣啦！」而噚日病住去綵排嘅連詩雅明顯聲沙沙，講嘢都陰聲細氣，佢話已經叫醫生加重咗藥，因為佢唔想打針，提到喺音樂會嘅演出，佢話會跳舞，會有驚喜畀大家。
撰文：馮仁昭