前港隊中場歐陽耀冲上周落實加盟葡甲球會葡萄牙體育會，不過因為啱啱加盟嘅關係，趕唔切喺上周六作客對杜迪拉嘅聯賽上陣。葡體會最後僅以1:1逼和對手，踢咗3場聯賽仲未開齋，希望周三迎戰甘馬雷斯B隊，歐冲有機會落場幫球隊開勝門。
雖然歐冲未有機會喺葡甲登場，但佢正式落戶葡體會後，上周六就首次喺fb貼咗張里斯本做背景嘅自拍相，仲留言話：「世界那麼大！」就咁已經得到400幾個like，仲有朋友留言打氣，希望佢努力創出自己嘅海闊天空，繼續為港足創造更多傳奇一刻喎。
講番葡體會，呢班波目前喺葡甲排下游，但全隊有成26個球員，包括8個中場，歐冲要爭正選確實有難度。不過，睇番佢哋作客杜迪拉場波嘅精華，球隊踢法以速度為主，但進攻好少經中場去組織，有波在腳多數踢去兩邊，如果中場多咗用波能力唔錯嘅歐冲，應該對球隊有幫助嘅。
最快禮拜三演處子戰
至於歐冲幾時先有機會落場，估計最快喺周三，因為嗰日球隊會喺當地黃昏時間主場鬥目前排中游嘅甘馬雷斯B隊，希望佢到時可以落場，順便幫球隊開齋就最理想喇。
識睇，一定係睇足英台【英波Live】：
http://soccer.appledaily.com
http://bit.ly/engballlive