阿仙奴今季兩場聯賽都係踢周六夜場，兩場都係先落後，不過喺上周六作客愛華頓時，兵工廠就冇喺聯賽首戰咁勁，能反勝水晶宮，但喺落後兩球下追和2:2，都算執番身彩；而喺呢場波，阿仙奴領隊雲格最關鍵嘅調動，可以話係喺74分鐘將表現冇影嘅中場韋舒亞換出，冇咗呢名黑腳之後，兵工廠成隊生晒，原來佢跌晒watt係因為俾女飛，好心佢失戀就急急讓位畀人踢啦。
我求大俠對韋舒亞並冇偏見，但呢名22歲嘅中場自從喺08/09球季出道兼被捧為英格蘭超新星以嚟，真係唔多覺佢有踢過太多好波囉，特別係對住強隊，就更加冇影，加埋又成日受傷，乜嘢英格蘭中場接班人吖？係twitter達人就真！喺場外紀律唔多好嘅韋舒亞，今夏世盃之後仲俾人影到喺賭城飲酒、食煙兼攬女，令支持佢嘅人好失望。不過，一手提捬韋舒亞嘅雲格都算係咁，喺開「咧」兩場聯賽都畀佢打正選，偏偏韋舒亞又唔爭氣，連同社區盾在內，兩場波都踢唔足90分鐘，而且都表現麻麻。
以上周六作客愛華頓一役為例，擔正嘅韋舒亞又係表現一無是處，仲攞埋黃牌，結果喺73分鐘又被換出，由辛迪卡索拉入替，而當時球隊就以0:2落後。喺兵工廠作出調動後，全隊表現生晒，喺83分鐘艾朗藍斯就接應卡索拉嘅傳球近射追成1:2，而喺臨完場前，基奧特仲頭槌破網，追和2:2，令阿仙奴保住1分。
賭城玩大咗 女友喊分手
賽後雲格都話知道有好多人批評韋舒亞踢得唔好，雲格話：「我覺得喺呢一刻，韋舒亞唔應該去就批評作出回應，佢應該專心踢好比賽，同埋改善自己嘅體能。」睇嚟，雲格真係差唔多撐無可撐嘞。
不過，據悉，韋舒亞打得咁屎係因為同佢嘅另一半樂倫分手。佢雖然同樂倫青梅竹馬，樂倫仲同佢生咗一仔一女，不過，因為佢喺賭城嘅事，就同佢炒咗好多鑊，最後分手收場。
識睇，一定係睇足英台【英波Live】：
http://soccer.appledaily.com
http://bit.ly/engballlive