市場盛傳滬港通10月就開車，耀才（1428）主席葉茂林形容呢個係「大時代」，咁緊要，當然唔止提升系統、推優惠吸客咁簡單，噚日市務總監郭思治（郭Sir）透露，財經台除咗會喺內地10個財經網免費轉播之外，遲啲仲會加插普通話問答環節，仲請咗前三色台藝人、今年27歲嘅曾臻（Eileen）做普通話主播。
耀才出名多女主播，來自內地嘅Eileen加入耀才好短時間，連卡片都未有。根據Eileen嘅微博，佢喺內地完成大學課程之後，再來香港喺浸會大學修讀碩士，佢仲識得詞曲創作，曾經做過三色台嘅普通話娛樂新聞報道主播。
另外，前亞視理財節目主播葉不落（Theo）亦都已經過檔耀才。
至於滬港通嘅吸客大計，耀才行政總裁陳啟峰三緘其口，只形容係天羅地網出擊，公司已花千萬元提升系統配合咁話。