專為肌萎縮性脊髓側索硬化症（ALS）籌款嘅淋冰水活動過去一周在港鬧烘烘，Green Monday創辦人楊大偉、專欄作家徐緣同埋康宏理財（1019）主席王利民算係發起人，係佢哋喺上周日率先跟風，將活動由美國帶來香港。但原來佢哋原先都唔清楚香港都有肌健協會，佢哋上周四就跟香港肌健協會會長劉偉明首度見面。
王利民形容，患有ALS嘅病人就好似困喺自己嘅身體裏面一樣，佢哋好需要資助去應付日常生活。雖然有人批評淋冰水籌款有浪費食水之嫌，佢就反駁「沖涼超過8分鐘都會嘥水喇」，佢認為今次籌款活動係本小利大，辦一個籌款活動可能仲勞民傷財。事實上，香港肌健協會過去一周就籌到過百萬元。眼下最大問題係點樣令市民繼續關注呢個病，點樣叫關愛基金唔好停止撥款津貼，唔好淋熄呢團火。