恒指勉強重上25000點，動力始終不足。大好友摩通上周出報告，話如果上周五（22日）能企穩25000點，就可上望32000點，仲話應該係easy job。望住呢份report，魏力即刻諗起2007年大牛市嗰時，瑞銀出咗份「神華101」報告，立論同樣是站唔住腳，純粹以誇張博出位，一笑置之之餘，更應提高警覺，慎防破位不成殺番轉頭。
板塊方面，藥股相當強勢，四環（460）、國藥（1099）、康哲（867）齊創52周新高，國企重組股南京熊貓（553）及中旅（308）爆到七彩；防守股中電（002）、電能（006）、港鐵（066）及長建（1038）都破晒頂。一般牛市而言，資金會沽防守股換增長股，如今聰明錢竟全線打防守波，或預示後市未必如想像般形勢大好。
異動股方面，可留意光滙石油（933）。外電彭博引述光滙行政總裁容伯強指，集團未來三、四年共斥資約300億元，在內地收購石油天然氣資產，令集團由油輪運輸和倉儲業務，變身為上游油氣生產商。目前，對市值253億元的光滙而言，市值勢水漲船高，加上截至6月底止全年業績可望扭虧，可睇高一線。
魏力
http://www.facebook.com/2012jason