蘋果公司股價大翻身，上周二收市升穿100美元大關，突破兩年前分拆後100.3美元嘅收市新高。每次股價爆上背後總有個故事，而今次蘋果創新高好真實，仲越升越有。
首先，蘋果股價年內累升超過25%，明年預測年市盈率由今年初11.5倍增至13.5倍，但仍然低過其他對手，包括Google（18.3倍）、微軟（17.4倍）同高通（15倍）。其次，即使今年蘋果盈利只係單位數增長，但蘋果公司架勢係cash夠多，仲向股東回水。過去兩年，蘋果用咗720億美金（約5,600億港元）回購同派息。蘋果仲好淡定，皆因仲有1,650億美金喺手，上個財年淨現金流都有490億美金。
其三，摩笛響起，大摩睇好蘋果喺今年公司財年加碼派息至120億美金，即係每股2美元，同延長股份回購計劃，的確好「和味」。其四，蘋果股價升點可以唔關iPhone事？傳大芒iPhone 6下月中推出，分析預測新機銷售將有630億美金，會較舊年多9%。既然iPhone 6銷情被睇高一線，再加埋蘋果不斷擴大服務範疇，包括收購網絡串流音樂服務商Beats、開展康健領域同網上付款功能等，亦為股價打咗支強心針。
其五，現時大戶持有蘋果股權比例只係得2.3%，仲少過蘋果喺標普500中嘅3.4%權重，亦造就蘋果股價勁升嘅理由。
C+B
本欄逢周一刊出