今季使超過2,000萬班費嘅東方，噚日喺九龍一間5星級酒店召開季前記者會，席上仲首播以7位數字製作、由殿堂級歌星林子祥（阿Lam）作曲兼主唱嘅會歌《東方傳奇》MV製作花絮，氣勢磅礡，總之就繼續施展銀彈戰術爭標，連總監梁守志都霸氣十足咁話︰「我哋乜盃都要攞晒，唔好漏畀人！」
「What is it this time?」向來搞作多多嘅東方，今季加碼捲土重來，噚日就先聲奪人，喺5星級酒店舉行季前記者會，全體職球員仲着晒老西出席，非常sharp醒。東方新一季人才濟濟，場內有成30個球員，就連場外都陣容強大，搵嚟「港版Iron Man」Eric Kwok編曲兼監製，加埋潘源良作詞，配上阿Lam洪亮嘅聲線，再不惜斥資過百萬拍個MV，打造《東方傳奇》。平時少睇本地波嘅阿Lam噚日仲話，嚟緊一定會多啲入場捧東方㖭。
葉鴻輝：拍MV難過踢波
雖然個MV仲未有得睇，但從噚日率先播出嘅製作花絮所見，製作非常認真，全隊職球員拍足17個鐘之餘，仲有瞓身演出㖭。首次拍MV嘅門神葉鴻輝就話︰「仲難過踢波，始終拍MV唔同真係落場，平時撲波唔使有咁多表情，所以都有唔少NG。」至於有唔少上鏡經驗嘅隊友文彼得，就「叻叻豬」咁話冇NG過，「可能我啲動作簡單啲啦，但最希望係啲Fans睇完之後，覺得我哋唔會好似波牛咁樣，形象正面啲。」
捧一隻盃袋7位數獎金
除咗MV之外，東方副總監歐偉倫仲透露，新球季繼續會有「打氣Angels」等一連串宣傳活動，球隊亦會施展銀彈戰術，務求擸晒所有錦標︰「拍個MV要7位數字濕濕碎啦，我哋每贏一個獎盃都會有呢個數，而聯賽冠軍就會更多，話晒都係第一屆港超聯嘛！」至於總監梁守志亦都霸氣十足︰「我哋下月1至6號會去天津友賽當地3支中超、中甲同中乙嘅球隊，之後7號至17號就會去馬來西亞友賽3至4場。今季我哋乜都要攞晒，唔好漏畀人！冠軍係我哋嘅，其他就留畀其他人啦！」
東方使得豪氣之餘亦為善最樂，繼將上季全年門票收入362,470蚊捐畀護苗基金後，新球季聯賽嘅主場收益亦將會捐畀奧比斯同免費午餐兩個慈善團體。
識睇，一定係睇足英台【英波Live】：
http://soccer.appledaily.com
http://bit.ly/engballlive