過去兩年環球經濟受衝擊，一眾歐美日銀行輪流做量寬，用一群人造牛對抗海嘯熊，但內地換屆搞改革，香港夾在中美之間，冰火幾重天，所以無乜大趨勢可言，跟勢買賣者無啖好食，好不容易終等到中央打貪完畢，再展升勢，唔少人都磨刀霍霍，諗住今次殺豬劏羊，有人話32000，有人話50000，我覺得唔係無可能，但係未大升前，我先潑一盆冷水，劏豬羊之前，小心被劏，但劏人者並非別人，是自劏。
何出此言？因有歷史可尋，香港股票歷史上升得最急的是2007年，但唔少人早早已浪費了唔少子彈，2002、2003資源股狂升，2004年宏觀調控，抬了唔少人出場，由8000多點升到14000多點，再回調落10000點，幅度雖然唔細，但未至於跌凸，但可惜沙士8000幾點時無人信狂升，升到萬一二點才入市，因為升了那麼多，先買細細注，嘩，其後越升越多，殺得性起，13000、14000點才大手加碼，太多對象，太有前景，此起彼落，對象太多錢太少，仲唔大做孖展，但宏觀一調，即刻水瓜打狗，14000點殺到10000點，做埋孖展殺傷力十足，其實14000點跌到10000點並非無底深潭，只係跌到10000點時無人話畀你聽會跌完，會唔會跌落9000、8000？宏調喎！結果自己嚇自己，所以整件事就係死在2003恐懼開頭，怕未跌完，唔買住，再嚟2004貪婪，就係驚死蝕底，牛市賺得少，最後再死在恐懼，怕無底深潭，一句留得青山在，變成整件事的輓聯，後來升到2007年，都賺番，但元氣大傷，已經不復當年勇，轉眼又到金融海嘯的2008年。
以古鑑今，今次係舊事翻版，似曾相識，又係對象太多錢太少。上個星期才聽見有朋友戲言，唔夠錢買貨，問邊間銀行守衞最鬆，笑死人！做完孖展仲用嚟買衍生工具，又係貪婪作怪，但近周市升當炒股回頭，已經會問筆者怕唔怕，其實唔算係真正的查詢，只係希望我幫忙壯膽。從希望個市下跌，到好驚個市跌，其實就明顯咁反映一個人take咗幾多risk同埋仲有幾多risk可以take；而喺兩者中間，即係當你對升市跌市唔會太興奮或太擔心時，可以相信，這才是適合閣下的risk exposure。我自己就覺得，這個benchmark比組合波動幅度等等更有用，始終，每個人的工作、資產、資金需求都唔同，risk profile亦都唔同，但無論怎樣，心情過度波動，都肯定係因為金額上落超出合適嘅範圍喇。
恐懼貪婪 反客為主
上周五，港股做陽燭，初步分析，周四的低位變成暫時的支持，這個位一方面可以係一個跳板，即係搵到暫時底部，再展升途，但另一方面如果市況再差，期指跌穿埋24905，加上當日做埋支陰燭，咁就響起了這輪升市的第一個警號，我認為大家應該收回過份放大的注碼，因為型嘅牛市，就係升一輪、橫行、調整，然後又升過，今時仲未有恐懼，但跌八九百點，貨太重就會驚。
無貪心他日就唔會恐懼，無恐懼就唔會因調整而自己嚇自己，知己知彼，倒不如在初見市況轉弱時收起子彈，到見人驚才考慮撈貨，利用其他散戶的恐懼貪婪，反客為主，做個不一樣的老羊。
張士佳