喺政圈行走江湖，必定要練定幾首飲歌傍吓身，否則點冧啲師奶同市民？堪稱政壇寸嘴王嘅立法會主席曾鈺成，原來唔只寸人叻，唱歌都好勁，由細到大都愛SING，自爆行走江湖嘅首本名曲，係羅文嘅《小李飛刀》；「難得一身好本領」嘅曾主席，亦「情關始終闖不過」。點「闖不過」？佢2009年再做老襯，俾培僑舊同事伍嘉敏俘虜咗有如鐵石嘅心。
曾鈺成喺港台節目《普選音樂》中透露，自細鍾意唱歌，讀書時加入歌唱團；喺培僑任教時，亦同其他老師組織小隊唱歌獻技。
粵劇音樂劇都like
從政後，佢更加發現需要飲歌，因為唔少地區活動都要獻唱一曲娛賓。佢自覺唱羅文嘅歌較合適，而《小李飛刀》較為掌握到，所以好快成為自己嘅飲歌。技癢嘅佢，仲喺節目中一展歌喉，唱咗兩句㖭！
有成十三兄弟姊妹嘅曾鈺成話，細細個同叔伯姑媽廿幾人住埋一齊，幾位叔伯好鍾意粵劇，所以自己都對粵劇由覺得煩厭漸漸聽出味道。至於外國音樂劇，佢尤愛《My Fair Lady》（窈窕淑女），當時要囈媽媽畀錢佢睇，最鍾意電影入面嘅一首歌《With A Little Bit Of Luck》，話歌詞好抵死。
李八方
mailto:[email protected]