現年26歲的華人騎師梁家俊，暑假曾主動到澳洲客串吸取經驗，回港後呢一日(23號)佢終於開操，佢話自己狀態好Fit，準備好迎接新馬季來臨。
梁家俊話暑假在澳洲逗留一個月，跟隨練馬師活侯夫人學藝，操了過百駒，贏了一場賽事，頭馬Cabalistic由穆罕默德酋長擁有，仲有機會喺當地遇上已掛靴嘅名將白德民，大家傾得好開心，喺佢穿針引線下，走遍澳洲多個馬場騎馬，響穆罕默德酋長嘅私人跑道，策騎酋長嘅周歲馬試閘，感覺新鮮，可惜嘅係始終冇乜頭馬機會，不過已大大擴闊視野。梁家俊此行一啲都唔寂寞，因為佢嘅靚靚女友兼評馬人李潔瑩阿Kit，有跟埋去澳洲，每次家俊仔出賽，阿Kit都進場打氣，陪伴左右兼照顧家俊仔嘅生活，簡直就係預支蜜月，非常Sweet。
家俊仔回港後，呢一日要穿長袖焗汗操馬，希望更fit體重更輕，避免被莫雷拉、田泰安兩位輕磅騎師進一步搶去座騎。家俊仔首日共操了六駒，四駒來自師傅蘇保羅，另外替摩廐「感恩」及「御皇鷹」在大圈快跳。對於今季展望，家俊仔表示有兩個目標，一是突破上季18場的頭馬數字，二是提高警覺減少不小心策騎，避免被罰款之餘，停賽更會流失座騎，大大影響成績。