「冰桶挑戰」全球hit爆，藝人兼馬會節目主持Icy黃婉曼玩完後，便向前馬王「軍事出擊」馬主梁芷珊（Canny）作出挑戰。梁芷珊就相約潘頓、黃婉曼在泳池邊互淋冰水。梁芷珊話自己好怕凍，一被淋完就要游水解凍，而佢本來邀請黃婉曼穿泳衣一齊玩，但Icy竟好狡猾話屋企冇泳衣，真係O晒嘴，不過最終 Icy件衫都露咗少少「事業線」，總算對得起觀眾。
除了梁芷珊、黃婉曼同埋潘頓，上市公司理文造紙首席執行官兼「包裝」系馬主李文斌亦玩埋一份，由練馬師孫達志幫手揸住「冰桶」，向佢兜頭淋。李文斌仲話會捐錢畀仁濟全癱病人基金及仁濟全心全意基金，叫有需要協助的病人，可致電2416 8033查詢。李文斌向三個人下戰書，其中一個係英國騎師郭能，佢透露郭能日內返香港就會「找數」。