夜場，以為一定是聲色犬馬夜夜笙歌，你會想到基督徒開夜場，目的是傳教的嗎？教徒孫耀威（老孫）就用夜場來傳福音，店門掛了一幅很大篇的主禱文；心中有耶穌的老孫與女友陳美詩（Macy）仍堅守婚前不會有性行為，他日前接受本報專訪說：「有時兜風會仲興奮，嗰樣嘢又唔係未試過！」
撰文：余燕儀
逢7必變，孫耀威入行首個7年，不懂普通話的他膽粗粗過台灣和內地發展；第二個7年，因掛住香港和家人，丟低如日中天的內地事業返港出唱片；今年第三個7年，老孫瞓身搞生意開夜場「CA Club」。
多靚女埋身
上海店搞得有聲有色，為了兼顧演藝工作及夜店生意，老孫不時周圍飛，幸女友Macy沒怨言，老孫感激女友的支持，坦言視對方為結婚對象：「我一定會負責任，我諗，哈哈！我同佢已經唔驚對方有變卦，慶幸佢從來冇畀一丁點壓力我，就算冇時間陪佢都唔會投訴，以前成日唔喺香港，女朋友走佬，但佢好體諒我，同佢一齊好舒服、安心，唔覺自己有必要搵另一個。我成日周圍去遇到咁多女人，好多主動埋身，甚至狼到Macy喺隔籬都拖我手，但你唔捨得傷害另一半，諗到呢樣就一盆冷水淋落嚟，無論幾靚女我唔都會有任何feel。」
身為教徒，老孫奉行婚前不會有性行為，但身為男人，真的可以忍到性衝動？老孫說：「人大咗學識珍惜，唔同細個定力差。如果想做咪結婚生仔，性對我唔係真係咁緊要，但又唔可以話唔緊要，唔可以講到自己冇性趣，有時覺得同Macy兜風4、5個鐘仲興奮，你明唔明？嗰樣嘢又唔係未試過，去到呢個時刻，我會珍惜兩個人相處。」
除了上海之外，孫耀威在台北也有開設分店，可惜因牌照問題被查封，千萬投資凍過水；上海店曾被指搵辣妹玩制服誘惑，老孫說：「唔係辣妹撐場，佢哋係表演者，生意模式同內地夜場好唔同，我希望係一個傳福音嘅地方，門口有好大篇主禱文。」
開夜店傳教
一般來說，夜場給人感覺都是女人與酒，傳福音是否太妄想？老孫說：「好多人覺得傳福音應該匿埋教會，我嘅心態係想將光帶去黑暗，喺夜場見到客人發酒瘋講粗口，我就會同佢講『不如聽日同我返教會，或者得閒嚟搵我，我叫牧師嚟傾偈。』我都鍾意玩，但唔使飲到鬧事失控，派對文化其實好開心，但𠵱家好多人將佢抹黑，加咗毒品、一夜情、黑社會，我想將真正健康派對文化帶番去華人社會。」
老孫沾沾自喜表示除客人外，幫他起club的判頭到工人，club的經理到員工，有八成因為他信耶穌：「喺夜場睇到好多人好寂寞，好多時靠飲醉忘記壓力，唔係真係享受音樂跳舞，因為心靈空虛喪劈酒掂毒品，所以，反而喺呢啲地方同佢講愛，佢會感到真正關心。」
化妝：小飯
髮型：Sunny Yu＠Hair Culture
服裝：MUSIUM DIV.＠I.T
場地：Misto Restsurant