美國隊成軍！美國男籃上周五喺紐約友賽擊敗波多黎各後，「K教練」科錫維斯基落實參戰西班牙主辦嘅世界盃12人名單（見附表），負傷上陣嘅戴歷路斯（D-Rose）仍然入選，變相就要犧牲同屬控衞嘅尼拉特，連同高華、哥頓希活同柏臣斯，4人被剔除最後名單之列。
公牛控衞戴歷路斯因傷缺陣對多明尼加共和國嘅友賽，D-Rose今仗復出兼後備上陣，面對由木狼後衞巴里亞領軍嘅波多黎各，贏波冇咩大問題，憑第3節打出35:20嘅攻勢，以112:86輕勝，3分射手史堤芬居里攻入20分最搶鏡，夏登同基爾都各入13分。
12人大軍只得兩射手
賽後K教練公佈12人名單，既然佢老人家對D-Rose咁放心，加上有K艾榮呢位當紮控衞，自然亦都要作出犧牲，結果成日幫拓荒者絕殺嘅尼拉特，就冇份出發西班牙；尼拉特今夏參與美國隊練習大大話話兩個月，被裁後難免酸溜溜，佢喺個人Twitter留言：「我終於第一次被裁走啦！」佢嘅拓荒者隊友阿域治幫拖回應：「要證明佢哋嘅決定係錯。」另外，美國都一口氣裁走3名外圍射手高華、哥頓希活同柏臣斯，雖然隊中仲有史堤芬居里同K湯遜，但就幾冒險，K教練就回應：「要挑選12人其實好困難，因為我哋擁有好強大團體，感謝所有球員一直以嚟參與練波。」世界盃比賽將於8月30日至9月14日舉行，美國身處C組，同組對手有多明尼加共和國、芬蘭、新西蘭、土耳其同烏克蘭。
識睇，一定係睇足英台【英波Live】：
http://soccer.appledaily.com
http://bit.ly/engballlive