有人話香港波係沒女，我唔同意；香港波，最多只係一名黃面婆！
唔知邊位名人講過，沒有醜女人，只有懶女人；而香港波呢位黃面婆，雖然識欣賞佢嘅人唔多，但其實佢並冇放棄過自己，當大家嘅眼光一直放喺養眼嘅洋妞身上，呢位黃面婆未嘗唔想大翻身。士別三月，換咗個潮Look，再加大身上行頭，要一吓翻身引來狂蜂浪蝶就可能大貪啲，但起碼都會得到老伴嘅一個情深注目禮啩。只可惜球場阿叔通常刻薄 ：「發老姣呀，十八廿二咩！」
有啲嘢擺得太近可能睇唔清楚，行後兩步反而望到多啲，喺啱啱去完嘅歐洲之旅，我聽到兩位新相識嘅外國朋友話：「香港我去過，such a lovely place！」聽到人讚自己個狗竇，可能真係有啲唔慣，我即時反應係話：「你呢度仲正啦！」 嘻嘻哈哈打發咗個對話，回頭先後悔點解唔問吓佢鍾意香港乜嘢，可能我哋對得呢個地方太耐，已經無晒感覺嘞！
又因為對住呢個黃面婆太耐，去旅行唞唞氣見少陣不知幾開心之際，咁啱又遇着幾位去working holiday嘅年輕人話思鄉。當佢哋話「我好掛住佢」時，真係一時諗唔起佢哋口中嘅就係香港！今次我醒咗，即刻問多句你掛住啲咩呢又！於是平時喺屋企唔講嗰啲說話都講晒出嚟嘞，「屋企人啦，嘢食啦，份工啦……」原來原本喺身邊係好多好嘢嘅！
香港波呢個黃面婆背後，其實包含住咁多年嘅笑聲叫聲滿載溫馨，將來仲有冇好日子呢，除咗阿黃面婆自己勤唔勤力之外，仲有就係我哋企喺旁邊剝花生嘅球場阿叔，會唔會少啲想當年，多啲望前面。因為洋妞再靚，都係人家嘅事，只有嗰位黃面婆，會留喺狗竇陪你過世。
而兩個老口子拖手仔行街街嘅畫面，永遠都係最溫馨嘅！
KEYMAN
節目主持電郵：
http://[email protected]