上季英超開鑼後，左丁山就膽粗粗預測冠軍不出曼城、車路士、曼聯三隊，點知跌咗少少眼鏡，曼聯只係得到第七名，今季無資格參加歐聯或歐霸盃。2014至2015年英超球季開波嘞，睇咗第一周賽事戰果，「碧科」熟口熟面，係車路士第一，曼城第二，阿仙奴第三，利物浦第四，曼聯落筆打三更，輸咗俾史雲斯，有冇得追呢？新領隊雲高爾大名鼎鼎，球迷對佢期望甚殷，曼聯名將史高斯話雲高爾係一位mad genius（瘋狂天才），冇理由好似上屆領隊莫耶斯咁醜怪㗎？
左丁山睇過重播各場比賽，不妨又試大膽預測，爭冠軍資格嘅只有三隊，就係曼城、車仔與阿仙奴，又以曼城、車仔係最大熱門。何解？車路士領隊摩連奴針對上屆弱點（入球少），斥資三千二百萬鎊買入馬體會迪阿高哥士達，呢位鋒將果然對辦，步大力雄，能衝善射，入球好有把握，車仔陣式可打四四二，可打四二三一，後防人手基本不變，上季係失球最少一隊，兩個防中拉美利斯與美迪，屬世界級，中場引入英超助攻王費比加斯，創意大增，故此全隊有前有後，攻守均衡，在英超足以稱雄。
曼城仍以上屆冠軍人馬為主，無大改變，引入一名巴西防中法蘭度係佳着，第一場對紐卡素，已見全隊合作無間，走位靈活、技術純熟，㩒住嚟踢，淨勝二比零，最有能力威脅車仔。阿仙奴人腳幾好，略嫌中場好手太多，且重於進攻，防守意識較差，後防從來冇俾球迷百分百信心，一被對手反擊，就有得震冇得瞓，基羅特與山齊斯唔係哥斯達、杜奧巴呢類典型殺手，要靠後上嘅神奇中場藍斯，把握力不足喎，阿仙奴呢幾季唔知係受咀咒吖還是體能訓練有問題，每到季中，啲主將就輪流受重傷，導致陣容不整，令人對阿仙奴奪標機會難有強大信心。至於利物浦，弊在增兵雖多，無一個可以鎮得住大場面，謝拉特已無青春銳氣，中場創意不足，一味靠快速行軍，碰到弱隊打十人密集，利物浦就會似老鼠拉龜咯。曼聯又如何，睇完第一場對史雲斯，只覺成隊只有朗尼、馬達及行將復出嘅雲佩斯有卡士，其他球員只適合打中型班，點爭前四呀，對愛華頓、熱刺、修咸頓都無把握贏波呀！正是巧婦難為無米之炊，雲高爾雖是明星領隊亦難以爭取佳績。