呢個禮拜香港獨旺「冰工廠」，皆因個個都捐幾嚿水然後淋冰。但係上個禮拜如果你係曼聯、阿仙奴同車路士擁躉，你已經有盤冰水照頭淋，皆因3隊首球都先輸，但當然3場逆境波都各有下場：車仔上半場輕鬆回禮、阿記北圈食尾糊，至於曼聯就喺主場都望唔到家鄉。
雲高爾（圖）主場首戰「撻Q」，都好難解釋，但如果佢肯參考我哋香港嘅「死撐王」張融，應該可以應付到千夫所指。第一句對記者當然係「我哋曼聯千辛萬苦，熱情十足出嚟打逆境波，球迷可以唔感動嗎？」。對於首球被史雲斯偷雞，可以話「呢單嘢係好嚴重嘅指控」，碌吓眼手指指就過骨。至於曼聯後防嘅問題，可以答「我唔係福爾摩斯」。至於曼聯主場輸波原因？應該係「開場時間太早」，史雲斯呢個球會點睇？「係一個好細嘅聯誼會，得200人，好快會喺英超中剔除」。朗尼關鍵罰球點解射唔入？就算主場都可以厚顏話「絕對係移花接木」，曼聯個陣係咪依然存在弱點？「全部都冇足夠嘅證據」。最後有乜補充？「曼聯好波嘅公信力係來自11人身水身汗跑出嚟，唔係你哋話冇就冇」。
雲高融再發起一個「保和平、保曼聯」嘅活動，然後叫班蛋散着車仔利記阿仙奴球衣簽名（有冇派錢自己諗），之後證明曼聯有百九幾萬人支持，巧威威。
梁柏堅
填詞人+彩池人