黎瑞恩跟家族擁有過百億資產的金利來集團三少曾智明，傳因有第三者，於本月初正式辦理離婚手續，結束十一年的夫妻關係。有傳負責照顧一對子女的黎瑞恩獲每月20萬元贍養費，及分得前夫千萬身家，但早前黎瑞恩已決絕否認：「膝頭對上就髀（畀）！」為撐起頭家，黎瑞恩近日積極蒲頭，連續兩晚出山幫老友鄭敬基和唐韋琪擔任演唱會嘉賓，似為復出鋪路。
唐韋琪演唱會爆棚
有傳唐韋琪在九展舉行的兩場《唐韋琪誇越時空兒歌演唱會》銷情欠佳，但昨晚卻全場爆滿。黎瑞恩做足兩場嘉賓，昨傍晚陪伴唐韋琪一齊接受傳媒訪問，黎瑞恩說：「小朋友今日有同學仔生日，所以冇嚟睇。」原來兩人早在寶麗金年代已認識，黎瑞恩說：「見佢最近出咗首好勵志嘅歌，打電話畀佢講聲加油，佢就邀請我做嘉賓。」問是否分毫不收？黎瑞恩笑笑口說：「梗係唔收，佢送咗個小忌廉頭畀我，但係我個樣，驚唔驚呢？」唐韋琪似乎好感激黎瑞恩仗義相助，語帶哽咽說：「盡在不言中，好多謝佢咁有義氣。」
唐韋琪就銷情不佳報道解釋：「其實好多內部認購，有啲忠心家長好快認購晒，原本只係做一場，下午開咗慈善場，有善長買咗飛請啲低收入、唔開心或單親小朋友嚟睇。」黎瑞恩繼續力撐唐韋琪，指音樂總監希望明年再辦。昨晚黎瑞恩獻唱《千年女王》、《我係小忌廉》、《淘氣小雪兒》等經典卡通片主題曲，而昨晚林家棟、王從希、蓋世寶等亦有捧場。
當年曾幫鄭敬基
另外，黎瑞恩前晚亦做鄭敬基（Joe）演唱會嘉賓，Joe自爆年幾前回流返港，透過好友李婉華介紹擔任黎瑞恩慈善騷嘉賓，他說：「當年我冇工開冇收入，小恩子請我食飯，又叫我去見工。」黎瑞恩尷尬說：「不過最後都見唔成。」但Joe仍懷感恩之心，兩人合唱《誰令你心痴》，黎瑞恩再獨唱《一人有一個夢想》表現淡定贏得全場掌聲。
採訪：盧妹
攝影：陳慧安
