球隊準備出外集訓同踢練習賽，今個星期來往咗波總幾次，希望可以喺隊波出發前搞掂啲華洋註冊。雖然聯賽下個月先開波，但有好多工夫都係早做好過遲，早啲預備，有咩事都有時間補救。
好多嘢以為好簡單，隨便啲都無問題，點知把關嗰個唔係咁睇，例如球員證件相咁。南歐大多眼窩深，唔知迷倒幾多女仔，話說今季有位舊狂牛兵加盟，我一向幫球員影相用電腦執埋，晒埋都係10蚊半打，以為可以平啲，點知波總把關嗰個，話球員張相眼肚太黑唔接受。
靚仔衰在眼肚黑
之後出盡形容詞描述個球員點靚仔，張相點殺死女，結果都要返去用電腦執過晒。見佢咁堅持，就算舊援再註冊都唔肯收，唯有死死氣攞番張相走人。落番停車場，咁啱撞到某球會高層，佢見我面燶燶，問我咩事，我梗係冇講啦，佢即刻拉我過大學食堂傾吓計敍吓舊，凍檸水落肚成個人爽晒。
同呢位高層認識廿幾年，知佢早年去過英國留學，對英國波鍾情而且仲幾有心得。我當然問吓佢睇完開鑼日啲波有咩心得，佢就搖搖頭話曼市雙雄今季前途各異。曼聯請到頂級教頭，但前中後3線唔加人，幾難有好成績，反而曼城又幾好幾平均咁話，仲話曼城班人踢起上嚟進取好多。
返到屋企即刻做功課，查吓兩隊波得失球後，今個星期向大家推薦2串1入球「大」，新特蘭對曼聯「大」有1.78倍，串曼城對利物浦呢場「大」有1.57倍，乘埋有2.79倍，唔錯囉。
文：本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive