泛民前日去完深圳賓館，同全國人大常委會副秘書長兼基本法委員會主任李飛講政改後，李飛後來同記者講，話會上面有個泛民議員用「頓開茅塞」嚟形容聽完佢噏政改之後嘅反應，後來仲有內地傳媒引用㖭！原來當時有在座嘅泛民議員已知呢位人兄「嘢已瀨」，仲話呢次唔係「頓開茅塞」，係「頓開茅廁」，搞到一地屎！
至於「頓開茅塞」者係邊個呢？各位唔使估喇，民協馮檢基噚日同八方認咗係佢！佢話當時只係想表達自己領悟到原來北京喺「國家安全」同「國際標準」想法，同泛民想法有嚴重矛盾，再加埋自己普通話唔多掂，結果講錯咗「頓開茅塞」喎！