政府在8月15日公佈第二季經濟增長率，實質GDP增長1.8%，按季萎縮0.1%，係近年比較差嘅數字，政府同時公佈2014年按季全年經濟增長嘅修訂預測，係2%至3%。
經濟分析師L就對全年GDP增長預測有啲意見。最簡單嘅計數方法，第一季增長2.6%，第二季增長1.8%，兩季平均增長係2.2%，現在已經係8月中，第三季已經過咗一半，照睇第三季嘅增長率都唔會好得過第一季啩，與第二季差唔多就比較合乎實況，假設如此，頭三季嘅增長率分別係2.6%、1.8%、1.8%，平均數就係2.1%，第四季如果增長不變，咁就全年平均係2%啦，但點解要加多條尾，話有可能全年增長3%呢，如果要達此目標，那麼每季度增長率會分別係2.6%、1.8%、1.8%、5.8%（第四季），咁咪嚇死人？第四季增長率冇理由突然之間急升3倍嘅啫。
因是之故，分析L對政府提出之修訂預測，由2%至3%大惑不解。財政司司長曾俊華已提出咗「完美風暴」嘅警告：佔中會破壞經濟穩定，咁做乜嘢政府經濟預測要與曾司長唱對台戲，估計第四季經濟形勢大好？此與政府財金官員刻意唱淡股市樓市嘅原意不符喎。
第二季GDP增長放慢，樓價在第三季7月、8月，卻屢創新高，港島樓價指數（中原城市領先指數CCL）在8月14日一季期報135.79，樓價上升1.23%，8大指數全部錄得升幅。原因係二手樓價持續破頂。左丁山最近與相熟經紀講電話，幫親戚搵沙田某屋苑七百呎單位，經紀話：「冇盤呀，左先生，政府嘅DSD、SSD令到好多業主封盤，或者一年前已經轉售為租，現在冇法子交吉出售，佢地最少要租兩三年，避免出售時要俾SSD，但見到租金唔錯，可以代佢地供樓，於是減低出售意欲，即是短炒變長揸，投機變投資，啲二手盤供應量咪縮晒水囉。我都好慘㗎，手上有客要買，但搵唔到單位要賣，我邊度有佣金收入呀！」既然買盤多過賣盤，二手樓價那會不升，曾司長、陳德霖話一旦熱錢離港，樓價會大受影響，殊不知熱錢來自境外人士，境外人士如來自大陸，買樓有目的，好少恐慌性拋售，熱錢如來自其他國家，只會買大豪宅，但有咗SSD與BSD之後，早已大幅度減少，故此熱錢一旦撤走，影響股市大，衝擊樓市小，目前樓價與GDP增長背馳，正是聯繫匯率底下之超低利率作怪，係一個結構性問題！