日前財爺鬍鬚曾寫咗篇關於「完美風暴」嘅網誌，「完美風暴」立即成為官場、政圈中人潮語，不過最近有官府中人同八方講，「完美風暴」真係有機會即將降臨，而刮起呢場「風暴」嘅人，唔係泛民同佔中三子，而係「魔童」王維基！
最近魔童再出手挑機，向商經局局長卡片蘇挑戰淋冰，卡片蘇接戰之餘，仲講話想同魔童冰釋前嫌。表面係客套說話，但喺某啲官府中人眼中，其實係先禮後兵，事關魔童司法覆核政府唔發牌畀港視單case，下禮拜就開審，魔童呢個時候現身挑機，正所謂「冰不厭詐」，官府中人自然猜測係咪為搞事做準備！
不過又唔怪得有官府中人「滴汗」，由於當日狼英死口唔認唔發牌畀港視同佢「一男子」有關，但係去到法庭，好多嘢都要公開，就唔到「一男子」唔認，若然俾傳媒、公眾質疑「一男子」當日係講大話，咁就真係大鑊。
隨時未到中秋已佔中
另一官府中人透露，最快今個月底，通訊局要對亞視續牌事宜有個說法，不論續或者唔續，都一定有爭議，再加埋31號人大常委會就政改將有決定，若果三件事炒埋一碟，分分鐘捲起「完美風暴」，再引爆大型群眾集會，未到中秋已佔中！當然或者有人覺得係咪誇張咗，太杞人憂天，但政總中人見到一隻狗被撞死，都瞬即變成萬人簽名聲討、幾百人去港鐵總部集會抗議，有邊個敢話下禮拜唔會出事？
李八方
mailto:[email protected]