政圈跟風玩冰桶挑戰方興未艾，噚日旅發局主席林建岳喺中環「找數」，邀請埋經民聯立法會議員林健鋒同梁君彥淋冰，但三位富豪騎樓底戴頭盔，身穿防水風褸、頭戴鴨舌帽淋冰，岳少話「驚走光」先咁密實，借題發揮話旅遊業進入「冰凍時期」，又點名「無官一身輕」嘅全國政協常委唐英年、中華廠商聯合會會長施榮懷同藝人曾志偉接受挑戰。
鐵頭仁挑戰劉夢熊
林健鋒就向佔中三子挑機，話要用冰水潑熄佔中火頭。民主黨單仲偕則向中聯辦主任張曉明挑戰，希望佢降吓火聽多啲港人意見。
民主黨何俊仁噚日接受黨友林立志挑戰，佢話一直有為罕有疾病嘅患者爭取權利，今次捐100蚊美金畀香港肌健協會，再挑戰劉夢熊、鄭耀棠同黨友單仲偕。鐵頭仁話劉夢熊「上刀山落油鑊都唔怕」，淋冰水濕濕碎啦。
在旁嘅單仲偕即時挑戰，再宣佈挑戰民建聯主席譚耀宗、張曉明同政制及內地事務局副局長劉江華，「希望佢哋降吓火，多啲聽港人意見，冷靜處理政改」。
建制派亦向泛民發戰書，梁君彥挑戰公民黨袋巾傑、民主黨劉慧卿同民協馮檢基，希望冰水可以令泛民冷靜啲喎。
