投資銀行賓架有喜訊喎。繼摩根士丹利上月底計劃將一班年資淺嘅賓架底薪調高25%後，市場傳出，美國銀行（圖）、摩根大通、花旗、高盛等美資大行都有類似計劃，較低級嘅員工有望獲得加薪20%。
《彭博》噚日引述消息人士指，美國銀行計劃向低級員工加薪兩成，全球投資銀行同交易部門員工都可以受惠，預計明年生效。
好多投行賓架呢幾年成日呻到樹葉落，一來大刁越來越少，競爭大；二來係金融海嘯後，全球大型金融機構嘅薪酬機制被睇到實，做賓架嘅人工同福利都冇以前咁好環境。可能就係因為咁，投行都越來越難留人。
之前有部份華爾街大行透過降低工作時數，希望改善初級員工嘅工作條件，以免佢哋轉去做私募基金或對沖基金，不過講到底，都係加薪最實際。