港足有喜訊！下個月上演嘅仁川亞運足球賽，噚日進行抽籤儀式，港足被編入B組，同組有阿富汗同上屆兩支手下敗仗烏茲別克同孟加拉，有望連續兩屆躋身16強。而目前喺葡萄牙追夢嘅前港腳「神之子」歐陽耀冲，同日亦盛傳喺葡甲落班。港足主帥金判坤聽到兩單消息都笑到四萬咁口！
仁川亞運足球賽將於下月14日喺南韓開鑼（見附表），噚日終於完成晒所有抽籤，當中上屆自1958年後再次躋身淘汰賽嘅港足，被編咗入有兩支老對手烏茲別克同孟加拉嘅B組；港足主帥金判坤，噚日出席港超聯記者會時認係抽到好籤：「避過東道主南韓同埋衞冕嘅日本同組，已經係好籤。我哋嘅目標係喺小組取得2勝1和，力爭小組首名出線，因為預計A組南韓同沙地阿拉伯，會分別以首次名出線，如果我哋能夠取得B組首名，16強對沙地嘅勝算，點都大過對南韓。」
歐冲傳踢葡體會
港足抽好籤，去屆領軍躋身16強嘅前港腳歐陽耀冲，噚日亦帶嚟喜訊，盛傳正式喺葡萄牙落班，加盟捲入有假波疑雲嘅葡甲球隊葡萄牙體育會。早前由荷蘭轉赴葡萄牙試腳嘅歐冲，其好友日前喺facebook爆料：「新球會，佢會着89號波衫，代表住我哋香港89一代上歐洲職業賽場比賽！歐冲BB，撐住呀！人生夢一場革命至蒼老！」
中國入F組避強敵
雖然暫時仲未聯絡到當事人證實，但阿Kim都戥呢位愛將開心，仲話如果佢喺當地獲得常規出場機會，定必會重召佢入港隊，話唔定10月14號對阿根廷場友賽都有佢份呢！
至於中國喺亞運就避開咗南韓、日本同埋伊朗等強敵，被編入F組，同組仲有北韓同巴基斯坦。國奧隊教練傅博話，同組對手實力不相伯仲，「無論同邊隊同組，都要以平常心面對。喺奧運嘅年齡層，大家球員嘅實力差唔多。北韓一直以來嘅優點就係身體強壯，作風兇猛，我哋好重視呢個對手。我仲未好了解巴基斯坦，因為呢一組只有兩場比賽，所以唔可能有任何閃失。」東道主南韓就喺A組，同組有馬來西亞、沙地阿拉伯同老撾；而日本就被編入D組，對手有科威特、伊拉克同尼泊爾。
識睇，一定係睇足英台【英波Live】：
http://soccer.appledaily.com
http://bit.ly/engballlive