渝港（613）揸住嘅確利達（1332），呢期股價大暴漲，狂升八倍，渝港炒資產升值，三個交易日大升咗57%。場內太平洋實業（767）同渝港好似，揸住嘅證券投資，股價一枝箭，但太實未點郁過，有得諗。
太實除咗財仔業務，亦有投資證券，兼係高手。以今年6月底數據作準，集團主力揸咗天行國際（993）6,275萬元，同博華太平洋（1076，前身第一天然）。粗略計，經博華一拆20股後，太實總共揸咗佢3.4億股。呢兩隻股不得了。
持股火箭式上升
齋計由太實今年6月尾半年結後，天行升咗74%，太實家底再漲1.23億元。後邊博華仲犀利，6月20號停牌，7月2號復牌，再公佈申請塞班島賭牌掂咗，股價到家陣係累升咗近兩倍。太實揸住博華撼貨，額外再增值咗3.5億元。就算單計呢兩個月，天行同博華已為太實增值4.7億元，兼超過太實家陣總市值4.3億元。
又若果由太實2013年尾買入博華一刻計，到家陣更加累升咗超過6倍。博華升勢，唔比確利達呢期升幅削，但太實現價（0.152元）仲喺一年橫行底上落，未點郁過。再講，太實揸住天行同博華，家陣等值8.5億元，相當於太實每股0.3元，係現價近兩倍，太實潛在變現，吸引到痹。
太實到今年6月尾嘅NAV0.42元，得0.34倍PB，連埋天行同博華呢兩個月增值，集團NAV已經上到0.6元，PB得番0.25倍。上邊渝港，呢期炒嚟自確利達資產增值，股價翻半番，PB縮窄到得番0.5倍。
炒資產大升值，太實一樣有偈，一樣當翻半番到0.23元計，太實PB都係得0.39倍，未上到上邊所講每股潛在變現值，同渝港PB水位。
錢雋
細價股專家
本欄逢周二、三、五刊出