穿衣的藝術，京官懂不懂？立法會大隊噚日北上見京官，身為主角嘅泛民主派，個個變身篋神，北上向京官送厚禮；而無論係做走過場花樽嘅建制派，或者呢場溝通大龍鳳焦點嘅民主派，都悉心打扮，莫非係想用衣飾，反映對政改嘅睇法？
一向戰鬥格嘅民建聯蔣麗芸，噚日戴住墨鏡以一身黑白look，手指指咁霸氣登場，似乎係示意：喺普選同篩選之間，冇中間地帶㗎，以「身」作則表明，喺政改上冇得讓步，預咗同泛民打一場硬仗！
泛民拉篋送民意
同樣黑超look嘅張宇人，戴住1984年買嘅首代Cartier眼鏡現身，佢話當年賣成1,700蚊，本來係眼鏡、後嚟改成太陽鏡。
咦！1984年咪就係《中英聯合聲明》簽訂之年？斷估佢唔係特登戴嚟贈興，想京官毋忘《聲明》承諾嘅港人自治啩？
到底泛民會唔會支持政改？北上嘅女將嘅衣着，似乎都有啲玄機。好似白鴿黨黃碧雲嘅橙裙襯白褸，預告政改「慘白」收場，唔似自己個名，黃加藍變綠晴空一片；工黨何秀蘭着黑褸，莫非提前哀悼，政改前路？
雖然深知呢場座談會或者只係一場騷，泛民都盡力向中央show muscle，個個變身自由神，拖篋北上去「旅行」，將篋裏面裝住嘅民間政改報告，「厚禮」贈京官當禮物，希望總數達175本嘅「饋寶」，有份決定香港政改的175位人大常委，人人有份，永不落空，最緊要按住民意，畀個真普選港人。
李八方
mailto:[email protected]