巴塞隆拿近年橫掃球壇，又贏錦標又贏口碑，除咗悅目踢法外，重用拉馬西亞青訓產品亦加分，記得高登潮文《怎樣才算真正擊敗巴塞》，當中就有如果青訓產品不及巴塞多，唔能夠稱之為擊敗巴塞，雖然搞笑成份多，但多少亦都反映巴塞以青訓兵自傲。
不過既要保持成績，又要重用青訓兵，其實好難搵到平衡點，巴塞曾經自豪嘅青訓兵，佩奧爾退休，法比加斯、艾錫古恩卡離隊，域陀華迪斯前途未卜，新一季陣容叫做穩站正選，得番美斯、恩尼斯達、碧基、布斯基斯4人，沙維美其名叫做隊長，但恐怕只屬後備。
安歷基新官上任，重視成績保住位置，亦都肯定比提拔新秀重要，一口氣簽入蘇亞雷斯、華美倫等新兵，變相令隊中新秀更難上位。上季外借愛華頓打到曉飛嘅迪路菲奧，再被借去西維爾，實在可惜，而原本都有機會上場嘅馬斯巴查，亦因球會簽入馬菲奧同華美倫兩位中堅，令上陣機會大減；沙治羅拔圖更加恐怕只能喺盃賽見面。
其實喺季前熱身賽睇到，巴塞後生仔仍然大把潛質，好似甘柏盃，梅尼亞同辛度拉美利斯都表現唔錯，希望安歷基唔好背棄巴塞「祖訓」，畀多啲青訓兵上陣機會啦。文：牽牛
識睇，一定係睇足英台【英波Live】：
http://soccer.appledaily.com
http://bit.ly/engballlive